Azərbaycanlı idmançıları yola salarkən çox böyük hüzn yaşadıq, amma idmançılarımız dedilər ki, onlar yoxdurlarsa, biz varıq.
YeniAN.az xəbər verir ki, bunu Türkiyə Ağırlıqqaldırma Federasiyasının Prezidenti Tələt Ünlü deyib ki, İrəvandakı Ağırlıqqaldırma üzrə Avropa Çempionatında Azərbaycan bayrağına qarşı edilmiş hərəkət onları çox məyus edib.
"Onsuz da bizim kədərimiz bizə yetər. Bilirsiniz, çox yaxın vaxtda zəlzələ fəlakəti ilə üz-üzə qaldıq, bir çox vətəndaşımızı itirdik. Lakin güclü bir dövlət olan Türkiyə bir an öncə yaralarını sağaltmağa başlayaraq heç bir fəaliyyətdən geri qalamayıb bizi Ermənistandakı Avropa Çempionatına göndərdi. Orada yaşanan xoşagəlməz olaydan sonra azərbaycanlı qardaşlarımızı o gün gecə yola salarkən dərin hüzn yaşadıq. Amma idmançılarımız dedilər ki, onlar yoxdurlarsa, biz varıq və əlimizdən gələnin ən yaxşısını etməyə çalışacağıq. "İki dövlət, bir millət inancı” ilə yarışlarda iştirak edib qızıl medal aldıqda Cansu qızımızın onu azərbaycanlı qardaşlarımıza hədiyyə etməsi çox dəyərli addımdır", - Tələt Ünlü deyib.
