Son illərdə ölkəmizdə fövqəladə hallar orqanlarının fəaliyyətinin yüksək səviyyədə təmin edilməsi ilə bağlı ardıcıl tədbirlər həyata keçirilir.
FHN-dən YeniAN.az-a verilən xəbərə görə, muxtar respublikada yanğın təhlükəsizliyinin təmin olunması məqsədilə Fövqəladə Hallar Nazirliyinə 5 müasir standartlara cavab verən yeni yanğınsöndürən avtomobili təqdim olunub.
Prezident cənab İlham Əliyevin diqqət və qayğısı ilə bu gün muxtar respublikada da əhalinin və ərazilərin fövqəladə hallardan qorunması sahəsində məqsədyönlü tədbirlər reallaşdırılır. Fövqəladə Hallar Nazirliyi yeni xidməti avtomobillərlə və texniki vasitələrlə təmin olunur, maddi-texniki bazası gücləndirilir.
Bu sahədə görülən işlərin davamı olaraq, Azərbaycan Respublikası Fövqəladə Hallar Nazirliyi tərəfindən Naxçıvan Muxtar Respublikası Fövqəladə Hallar Nazirliyinə yaşayış sahələrində, sənaye, dağlıq-meşə zonalarında baş verən yanğınların söndürülməsi üçün Rusiya istehsalı olan 3 ədəd "KamAZ” və 1 ədəd "Ural” markalı yanğınsöndürən, Almaniya istehsalı olan 1 ədəd isə "İveco” Magirus markalı 42 metr hündürlüyə uzanan avtonərdivan avtomobili verilib.
Avtomobillər çoxprofillidir, yanğın yerinə şəxsi heyətin, yanğın texniki və xilasedici avadanlıqların, suyun və köpükəmələgətirən maddələrin daşınması, çoxmərtəbəli binalardan insanların təxliyəsi və əşyaların çıxarılması, xilasedici və yanğınsöndürənlərin yuxarı mərtəbələrə qaldırılması, yanğın yerinin işıqlandırılması eyni zamanda, digər köməkçi işlərin görülməsi üçün istifadə olunacaq.
