"Moskva hər zaman sülh şərtlərini müzakirə etmək üçün Azərbaycana və Ermənistana kömək etməyə hazırdır. Təəssüf ki, İrəvan üzərinə götürdüyü öhdəlikləri yerinə yetirməyə hazır deyil, buna görə də bütün səylər hələ ki, uğursuz olub”.
Bu barədə Rusiya Federasiyasının Dövlət Dumasının Təhlükəsizlik Komitəsinin üzvü Dmitri Savelyev AZƏRTAC-a bildirib.
Dövlət Dumasının Müdafiə Komitəsinin sədri Andrey Kartapolovun Rusiya sülhməramlılarının silahlarının yalnız özünümüdafiə vasitəsi kimi onlara lazım olması barədə sözlərini şərh edərkən, Dmitri Savelyev qeyd edib ki, Rusiya XİN Qarabağ münaqişəsinin həllində Moskvanın vasitəçilik rolundan dəfələrlə danışıb.
"Rusiya beynəlxalq hüququn, həmçinin Bakı və İrəvanın Moskvaya verdiyi səlahiyyətlər çərçivəsində ciddi şəkildə hərəkət edərək Qafqazdakı vəziyyətin sabitləşdirilməsi üçün mümkün olan hər cür səy göstərir. Rusiya XİN dəfələrlə qeyd edib ki, Qərbin qondarma vasitəçilərinin müdaxiləsi yalnız münaqişənin kəskinləşməsinə gətirir. Bunu da biz hazırda müşahidə edirik”, - deyə Dmitri Savelyev qeyd edib.
Deputat həmçinin vurğulayıb ki, Qarabağdakı Rusiya sülhməramlıları yalnız Azərbaycan və Ermənistan arasında razılaşmalara əməl olunmasını təmin edir.
"Sülhməramlılarımız hər iki tərəfdən ordu ilə birlikdə çıxış edə bilməzlər. Çünki beynəlxalq hüquq çərçivəsində ciddi şəkildə hərəkət edirlər. Sülhməramlılar tərəflərin razılaşdırılmış səlahiyyətlərinə uyğun olaraq təyin olunmuş ərazidə onun yerinə yetirilməsinin qarantı kimi çıxış edirlər. Rusiyanın mövcud tərəf kimi münaqişəyə cəlb edilməsi əldə edilmiş razılaşmalardan kənara çıxır. Moskva vasitəçidir, biz hər zaman tərəflərə sülh şərtlərini müzakirə etməkdə kömək etməyə hazırıq. Təəssüf ki, İrəvan üzərinə götürdüyü öhdəlikləri yerinə yetirməyə hazır deyil. Buna görə də bütün səylər hələ ki, uğursuz olub”, - deyə Dmitri Savelyev söyləyib.
